Federata Shqiptare e Futbollit, në bashkëpunim me Universitetin e Shkodrës “Luigj Gurakuqi”, organizuan takimin me Rektorin, prof.dr.Adem Bekteshi dhe përfaqësuesit e stafit akademik të departamentit Edukim Fizik e Sporte.

Federata Shqiptare e Futbollit në bashkëpunim me Universitetin e Shkodrës “Luigj Gurakuqi” dhe departamentin e Edukimit Fizik e Sporte, më 24 janar 2020, organizuan një takim me Rektorin e këtij universiteti, prof.dr.Adem Bekteshi dhe me përfaqësuesit e stafit akademik të departamentit. Ky takim u organizua në kuadrin e bashkëpunimit që departamenti i Edukimit Fizik e Sporte ka me këtë federatë.

Përfaqësuesit e Federatës Shqiptare, z. Luigi Febbrari, (përgatitës fizik i ekipit kombëtar A dhe përgjegjësi i përgatitësve fizikë për ekipet kombëtare), z. Dritan Babamusta (përgjegjësi i ekipeve kombëtare) dhe z. Iris Selimi (përgatitësi fizik i ekipit kombëtar U21 dhe ndihmësi i Luigi Febbrarit), shprehën kënaqësinë  për këtë takim, i cili kishte në fokus të tij temën mbi pjesëmarrjen e studentëve në kursin e "Përgatitësit fizik" dhe pajisjen e tyre me licencë.

Federata Shqiptare e Futbollit, gjatë sezonit futbollistik 2020-2021, do të vendosë që të gjitha ekipet e futbollit në superiore dhe kategorinë e parë, do të jenë të obliguara të kenë në stafet e tyre përgatitësit fizikë.

Nga ana tjetrër, Rektori i Universitetit të Shkodrës “Luigj Gurakuqi”, prof. dr. Adem Bekteshi, shprehu falënderimet e tij për këtë mundësi që u ofrohet studentëve të Universitetit të Shkodrës, si dhe theksoi që kjo është një inciatiavë mjaft e mirë.